«Самұрық-Энерго» АҚ Басқарма Төрағасы Аңсар Айдаров Құрылтайдың Экономикалық саясат, өнеркәсіп және энергетика комитетінің отырысында компанияның негізгі энергетикалық жобаларының іске асырылу барысы туралы баяндама жасады.
Ол Алматы 2-ЖЭО-ны жаңғырту, 3-ЖЭО-ны қайта құру, Екібастұз 2-МАЭС-ты кеңейту, Көкшетау, Семей және Өскемен қалаларында жаңа жылу электр орталықтарын салу, сондай-ақ Қызылорда облысында бу-газ қондырғысының құрылысына дайындық жұмыстары туралы баяндады.
Комитет Төрағасы Наталья Годунова құрылыс жұмыстарын жеделдету қажеттігін атап өтті. Ол Мемлекет басшысының Жолдауында инфрақұрылымдық жобалардың іске асырылу қарқынына қатысты сын айтылғанын еске салды.
Самұрық-Энерго басшысы аталған жобалардың ерекше бақылауда екенін, құрылыс жұмыстарының барысы мен белгіленген мерзімдердің сақталуына бақылау күшейтілгенін хабарлады.
Бұл жобаларды іске асыру еліміздің энергетикалық инфрақұрылымын дамытуға, электрмен жабдықтау сенімділігін арттыруға және өңірлердің электр энергиясына деген өсіп келе жатқан сұранысын қамтамасыз етуге бағытталған.
