2026 жылғы 30-31 қазанда «Самұрық-Энерго» АҚ Басқарма Төрағасы Аңсар Айдаров Алматы жылу электр орталықтарындағы құрылыс жұмыстарының барысын тексерді. «АлЭС» АҚ басшылығымен бірге 2-ЖЭО және 3-ЖЭО құрылыс алаңдарын аралады.

Алматы 3-ЖЭО-да «Самұрық-Энерго» АҚ басшысы станцияны қайта құру жобасының іске асырылу барысымен танысты. Бас мердігердің ақпараты бойынша, №1 газ турбинасы мен генератор іргетасқа орнатылып, жобалық ось пен белгіге сәйкес орналастырылды. Қосалқы жабдықтарды монтаждау жұмыстары жалғасуда. №1 бу турбиналық қондырғысының іргетасын салу жұмыстары аяқталды, кәдеге жаратушы қазандықтың металл конструкциялары орнатылып, қыздыру беттері мен барабандары монтаждалды, түтін мұржаларын монтаждау жұмыстары аяқталуға жақын. Сонымен қатар газ дайындау пунктін, циркуляциялық сорғы станциясын, градирнялар мен су дайындау қондырғысын қоса алғанда, станцияның қосалқы нысандарын салу жұмыстары күшейтілді.

Алматы 2-ЖЭО-да Аңсар Айдаров үш газ турбинасын, бу турбинасын және су жылыту қазандығын аралап, олардың жай-күйімен танысты. 2026 жылғы 31 қазанда табиғи газға көшірілген су жылыту қазандығы Алматы қаласының орталық жылу желісіне алғаш рет жылу берді. Осылайша, жаңғыртылған стансадан жылу энергиясы желіге алғаш рет жеткізілді.

Құрылыс алаңдарын аралау қорытындысы бойынша Самұрық-Энергоның басшысы Аңсар Айдаров «АлЭС» АҚ және мердігер ұйымдардың қатысуымен кеңес өткізді. Ол жұмыстарды күшейту қажеттігін атап өтіп, энергетикалық нысандарды белгіленген мерзімде пайдалануға беруді қамтамасыз ету үшін тиісті шараларын қабылдауды тапсырды.

«Самұрық-Қазына» АҚ Басқармасының шешімімен Аңсар Айдаров «Самұрық-Энерго» АҚ Басқарма Төрағасы болып тағайындалды.

«Самұрық-Қазына» АҚ басшысы Нұрлан Жақыпов компания ұжымына жаңа басшыны таныстырып, жұмыс кеңесін өткізді. Кеңес барысында ол негізгі инвестициялық жобаларды іске асыру мерзімдерін қатаң сақтау қажеттігін атап өтіп, электр станцияларының уақтылы пайдалануға берілуін қамтамасыз етуді талап етті.

Аңсар Айдаров «Самұрық-Қазына» АҚ компаниялар тобында 2013 жылдан бері жұмыс істейді. Бұған дейін «Энергия Семиречья» ЖШС бас директоры, «Самұрық-Энерго» АҚ Жобалық кеңсесінің басшысы және инвестициялар жөніндегі бас директоры қызметтерін атқарған.

«Самұрық-Энерго» АҚ-да еншілес және тәуелді ұйымдардың өндірістік бөлімшелерінің басшыларымен кеңес өтті. Жиын Өндіріс жөніндегі басқарушы директор Ғалымбек Ауталиповтің төрағалығымен өтті.

Күн тәртібіндегі негізгі мәселе өндірістік нысандардағы ағымдағы жағдайды талдау және аудит қорытындылары бойынша қауіпсіздік стандарттарының сақталуын қатаң бақылау болды. Еңбекті қорғауға формалды түрде қарауға және қауіпсіздік талаптарын елемеуге мүлдем жол берілмейтіні атап өтілді.

«Самұрық-Энерго» АҚ өндірістік қауіпсіздікке мониторинг жүргізуді күшейтеді. Компания бөлімшелерге жүйелі аудит жүргізуді жалғастырады. Ал еншілес және тәуелді ұйымдардың барлық деңгейдегі басшылары қызметінің тиімділігін бағалаудағы негізгі көрсеткіш жұмыс орындарындағы еңбекті қорғаудың нақты жай-күйі болмақ.

«Самұрық-Энерго» АҚ компаниялар тобының кәсіпорындары 2026 жылдың қаңтар–қыркүйек айларында 29,6 млрд кВт·сағ электр энергиясын өндірді. Бұл жоспардан 2,9%-ға және 2025 жылдың сәйкес кезеңіндегі көрсеткіштен 1%-ға жоғары.

Жалпы нәтижеге негізгі үлесті қосқан - жылу электр станциялары. Олар 24,7 млрд кВт·сағ электр энергиясын өндіріп, жоспарды 3%-ға асыра орындады. Екібастұз 1-МАЭС станциясы 18 млрд кВт·сағ электр энергиясын өндіріп, жоспардағы көрсеткіштен 4%-ға жоғары нәтижеге қол жеткізді.

Самұрық-Энерго су электр станциялары 4,64 млрд кВт·сағ электр энергиясын өндірді. Бұл да жоспардан 4%-ға жоғары. Су электр станциялары арасында ең жоғары нәтижелерді Шардара және Өскемен СЭС-тер көрсетіп, жоспарлы көрсеткіштерді 108%-ға орындады.

Астанада Қазақстан мен Қытай арасындағы энергетикалық жабдықтар саласындағы техникалық ынтымақтастық форумы өтуде. Іс-шараға екі елдің мемлекеттік органдарының, энергетика және машина жасау кәсіпорындарының, салалық қауымдастықтарының өкілдері қатысты.

Форумда «Самұрық-Энерго» АҚ атынан компанияның Өндіріс жөніндегі басқарушы директоры Ғалымбек Ауталипов сөз сөйледі.

Қатысушылар энергетикалық жабдықтарды жаңғырту, сервистік қызмет көрсетуді жергіліктендіру, қосалқы бөлшектерді жеткізу, техникалық мамандарды даярлау және бірлескен кәсіпорындар құру мәселелерін талқылады.

Форум аясында «Қытай – ШЫҰ» сауда-экономикалық институтының Жасыл энергетикаға сервистік қызмет көрсету орталығының салтанатты ашылу рәсімі өтті. Орталық энергетикалық машина жасау саласындағы Қытайдың жетекші кәсіпорындарының ресурстарын біріктіреді.

Республика күні қарсаңында «Самұрық-Қазына» АҚ-да Қордың компаниялар тобы қызметкерлерін салтанатты марапаттау рәсімі өтті.

Жоғары кәсібилігі және энергетика саласының дамуына қосқан елеулі үлесі үшін «Самұрық-Энерго» АҚ компаниялар тобының қызметкерлері мемлекеттік наградалармен маратталды.

«Құрмет» орденімен:

Асылов Абай Ноғайұлы — «Алатау Жарық Компаниясы» АҚ басқарма төрағасы марапатталды.

«Ерен еңбегі үшін» медалімен:

Наурзғалиев Асан Әкімғалиұлы — «Екібастұз 1-МАЭС» ЖШС бас директоры;

Рахимжанова Жұлдыз Тілектесқызы — «Екібастұз 2-МАЭС станциясы» АҚ химия цехының бастығы;

Салимов Фазоил Фазиолович — «Алматы электр станциялары» АҚ А. Жақұтов атындағы 2-ЖЭО өндірістік департаментінің директоры марапатталды.

«Самұрық-Қазына» акционерлік қоғамының құрметті қызметкері атағына:

Горохов Александр Савельевич — «Алматы электр станциялары» АҚ 3-ЖЭО өндірістік департаменті логистика бөлімінің бастығы ие болды.

Әріптестерімізді лайықты марапаттарымен шын жүректен құттықтаймыз! Алдағы уақытта кәсіби табыс пен жаңа жетістіктер тілейміз!

«Самұрық-Энерго» АҚ өз қызметін жүзеге асыратын өңір – Павлодар облысында тарихи-мәдени маңызы бар нысандарды абаттандыруға және келушілерге қолайлы жағдай жасауға бағытталған бірқатар әлеуметтік жобаны іске асырды. Бұл ретте Қазақстанның екі көрнекті тұлғасы – ақын Мәшһүр Жүсіп Көпейұлы мен академик Шапық Шөкиннің есімдерімен байланысты тарихи-мәдени мұра нысандарына ерекше назар аударылды.

Павлодар облысының Баянауыл ауданы аймағындағы ағартушы, ойшыл Мәшһүр Жүсіп Көпейұлының кесенесі – еліміздің әр өңірінен және шетелдерден келетін жұртшылық тәу ететін маңызды рухани орталық. «Самұрық-Энерго» АҚ тарихи кешеннің айналасын абаттандыру жұмыстарын жүргізді. Кешен қасбеттеріне жарық шамдары орнатылып, санитарлық нысандарға апаратын жаяу жүргіншілер жолы жаңартылды. Санитарлық тораптар жарықтандыру жүйесімен, сантехникалық жабдықтармен және автономды жылыту жүйесімен қамтамасыз етілді. Модульдік нысандардың кіреберіс алаңдары, қоршаулары бар баспалдақтармен, пандуспен жасақталды. Жаңартылған инфрақұрылым кешенге жылдың кез келген мезгілінде қолайлы жағдайда келуге мүмкіндік береді.

Мәшһүр Жүсіп өмірінің соңғы күндерін өткізген кесененің маңында шамамен 300 ағаштан тұратын саябақ сақталған. Ағаштарды сақтап, олардың жайқалып өсуіне жағдай жасау мақсатында «Самұрық-Энерго» АҚ автоматты суару жүйесін орнатып, сорғылар мен күн панельдерін қойды. Сондай-ақ аумақта су жинауға арналған резервуарлар орналастырылып, олар өзара құбырлар арқылы жалғанды.

Мәшһүр Жүсіптің және оның отбасының өмірімен тарихи тұрғыдан тығыз байланысты Сарыбұлақ бұлағын абаттандыруға да айрықша көңіл бөлінді. Бұлақты сақтау және қорғау мақсатында оның айналасы ретке келтірілді: су арнасы қоршалып, бастаудың үстіне ағаш қалқа орнатылды, маңына тас төселген алаң жасалды. Ал су ағынының үстінен металл қоршаулары бар жаяу жүргіншілер көпірі салынды.

Ағынды сулардың табиғи су айдынына түсуіне жол бермеу үшін оларды автономды септикке бұру көзделген.

Тағы бір маңызды жоба – Павлодар облысы Баянауыл ауданының Жаңажол ауылында орналасқан көрнекті ғалым-энергетик, академик Шапық Шөкиннің мемориалдық музейін жаңғырту жұмыстары болды.

Ұзақ жылдар бойы музей негізінен ауыл мектебінің күшімен күтіп-ұсталып келді. Ғимарат жөндеуді, ал келушілерді қабылдау жағдайлары жақсартуды қажет етті. «Самұрық-Энерго» ұжымының қатысуымен ғимараттың қасбеті жөнделіп, жарықтандыру жүйесі мен жиһаздары жаңартылды. Компанияның бұл жобаға қатысуының кәсіби мәні ерекше. Бұл – кезінде энергетика саласының негізін қалаған тұлғаның рухына көрсетілген құрмет. Бүгінде осы энергетика саласын еліміздің мыңдаған кәсіби мамандарынан құралған ұжым одан әрі дамытып келеді.

Іске асырылған барлық жобаның ортақ мақсаты – Қазақстанның мәдени мұрасын сақтау, атақты, елге белгілі отандастарымыздың есімдері мен еңбегін ұлықтау және тарихи маңызы бар нысандарға келушілер үшін қолайлы жағдай жасау. Осылайша, «Самұрық-Энерго» АҚ тарихи жадыны сақтауға, ұлттық құндылықтарды келер ұрпаққа жеткізуге және рухани мұрамызды дәріптеуге елеулі үлес қосып келеді.

«Самұрық-Энерго» АҚ Басқарма Төрағасы Қайрат Мақсұтов China Energy Overseas Investment Co., Ltd компаниясының Басқарма төрағасы Линь Сяоданьмен кездесу өткізді.

Кездесу барысында тараптар Түркістан облысында қуаты 300 МВт күн электр станциясын салу жөніндегі бірлескен жобаның іске асырылу барысын талқылады. Қазіргі уақытта құрылыс алаңында фотоэлектрлік модульдердің шамамен 70%-ы орнатылған. Тараптар құрылыс-монтаждау және іске қосу-баптау жұмыстарының келесі кезеңдерін, құрылыс кестесін сақтау және қажетті ресурстарды тарту мәселелерін қарастырды.

Электр энергиясын желіге алғаш рет беру 2026 жылғы желтоқсанға, ал станцияны толық пайдалануға беру 2027 жылдың I тоқсанына жоспарланған.

Сондай-ақ Қарағанды облысында қуаты 500 МВт жел электр станциясын салу жобасының іске асырылу барысы қаралды. Құрылыс алаңында бастапқы дайындық жұмыстары жүргізілуде. Жел энергетикалық қондырғыларын монтаждау мен электр беру желілерінің құрылысын бастау 2027 жылдың басына жоспарланған. Алғашқы электр энергиясын өндіру 2028 жылы күтілуде. Алдағы кезеңдерді уақтылы орындауға, жобаны қаржыландыруды қамтамасыз етуге және Қазақстанда өндірілген жабдықтарды қолдану аясын кеңейту мүмкіндіктеріне ерекше назар аударылды.

Бұдан бөлек, тараптар Қазақстан Республикасы мен Қытай Халық Республикасы арасындағы халықаралық ынтымақтастық аясындағы перспективалы жобаларды талқылады. Атап айтқанда, Жетісу облысында энергия жинақтау жүйесі бар, жалпы қуаты 1 ГВт жел электр станцияларын салу жобасын іске асыру перспективалары қарастырылды.

Кездесу қорытындысы бойынша тараптар серіктестікті одан әрі нығайтуға өзара мүдделілігін растады. Сондай-ақ жобаларды іске асыру жөніндегі бірлескен жұмысты жалғастыруға, олардың орындалу барысына, белгіленген бақылау кезеңдері мен мерзімдерінің сақталуына тұрақты мониторинг жүргізуге уағдаласты. Ынтымақтастық жаңартылатын энергетиканы дамытуға және Қазақстанның энергетикалық әлеуетін нығайтуға бағытталған.

«Самұрық-Энерго» АҚ компаниялар тобына кіретін «Бірінші жел электр станциясы» ЖШС ЕҚЫҰ Энергетикалық ауысу жөніндегі жаһандық әйелдер желісінің (GWNET) қатысуымен ұйымдастырған Орталық Азияның энергетика секторындағы әйелдердің кәсіби даму бағдарламасына қатысушылардың халықаралық делегациясын қабылдады.

Сапарға Орталық Азияның бес елінен — Қазақстан, Қырғызстан, Тәжікстан, Түрікменстан және Өзбекстаннан, сондай-ақ ЕҚЫҰ мен GWNET ұйымдарынан 20-дан астам өкіл қатысты.

Жаңартылатын энергия көздерін (ЖЭК) дамытудағы қазақстандық тәжірибемен танысу үшін Ақмола облысының Ерейментау қаласы маңында орналасқан Бірінші жел электр станциясы таңдалды. Сапар барысында қатысушылар станцияның инфрақұрылымымен, жел энергетикалық қондырғыларын пайдалану ерекшеліктерімен және Қазақстанның табиғи-климаттық жағдайларында жаңартылатын энергия көздерін қолданудың практикалық қырларымен танысты.

Бірінші жел электр станциясы — Қазақстандағы өнеркәсіптік жел энергетикасының алғашқы ірі жобаларының бірі. Станция 2015 жылы пайдалануға берілді. Іске қосылған сәттен бері өндірілген электр энергиясының жалпы көлемі 1,57 млрд кВт·сағ-тан асты.

Іс-шара ЕҚЫҰ-ның «Энергетикалық қауіпсіздік пен тұрақты даму үшін Орталық Азияның энергетика секторындағы әйелдердің экономикалық мүмкіндіктерін кеңейтуге жәрдемдесу» халықаралық жобасы аясында өтті. Жоба әйелдердің кәсіби және көшбасшылық құзыреттерін дамытуға, олардың энергетика саласына қатысуын арттыруға бағытталған.

«Самұрық-Энерго» АҚ-ның осындай халықаралық бастамаларды қолдауы ЖЭК жобаларын іске асырудағы практикалық тәжірибені таратуға, салалық құзыреттерді нығайтуға және халықаралық ынтымақтастықты дамытуға ықпал етеді.

«Самұрық-Энерго» АҚ Басқарма Төрағасы Қайрат Мақсұтов компаниялар тобының кәсіпорындарындағы өндірістік қауіпсіздік мәселелері бойынша биылғы жылдың 9 айының қорытындысы бойынша кеңейтілген кеңес өткізді. Жиынға қатысушылар ағымдағы көрсеткіштерді, профилактикалық бағдарламалардың іске асырылу барысын жан-жақты талдап, алдағы кезеңге арналған негізгі міндеттерді айқындады.

Кеңес барысында өндірістік жарақаттанудың алдын алу, процестерді цифрландыру, ішкі бақылаудың тиімділігін арттыру және көлік қауіпсіздігін қамтамасыз ету мәселелеріне ерекше назар аударылды.

Жиында еншілес және тәуелді ұйымдар басшыларының жүргізілген тексерулердің қорытындылары және анықталған кемшіліктерді жедел жоюға бағытталған кешенді шаралар туралы баяндамалары тыңдалды.

«Самұрық-Энерго» АҚ Басқарма Төрағасы Қайрат Мақсұтов күзгі-қысқы кезеңде сенімділік пен қауіпсіздікті қамтамасыз етуге қатысты нақты талаптар қойды.

«Бақылау тиімділігінің басты өлшемі – апаттардың болмауы, сондай-ақ қызметкерлеріміздің толық қауіпсіздігін қамтамасыз ету және инфрақұрылымды қорғау», – деп атап өтті Қайрат Мақсұтов.

Кеңес соңында еншілес және тәуелді ұйымдардың басшыларына бірқатар нақты міндеттер жүктелді.