«Самұрық-Энерго» АҚ Басқарма Төрағасы Қайрат Мақсұтов Италияның Генуя қаласындағы «Ansaldo Energia» зауытында болып, газ турбиналарын өндіру процесімен танысты. Осы жылдың қаңтар айында Қазақстан Президентінің Италияға сапары аясында «Ansaldo Energia» компаниясымен Алматы 3-ЖЭО-ны қайта құру үшін 2 газ-турбина қондырғысы жиынтығын жеткізу үшін келісімге қол қойылды. Газ турбиналары мен генераторларды жеткізу 2025 жылға жоспарланған.

Жұмыс сапары барысында Самұрық-Энерго басшысы Қайрат Мақсұтов «Ansaldo Energia S.p.A» Бас директоры Фабрицио Фаббримен кездесті. Тараптар жоғары технологиялық энергетикалық жабдықтарды өндіру, газ турбиналық жабдықтар өндірісін оқшаулау және Қазақстан аумағында сервистік орталықтарды ұйымдастыру мәселелерін талқылады. Бұл өз кезегінде энергетикалық жабдықтардың құнын төмендету, тәжірибе алмасу және қазақстандық мамандардың біліктілігін арттыру үшін қолайлы жағдайлар жасайды.

Ansaldo Energia S.p.A – Еуропадағы электр станцияларының жабдықтарын жобалаумен, өндірумен және оларға қызмет көрсетумен айналысатын ең ірі энергетикалық компания.

«Самұрық-Энерго» АҚ Басқарма Төрағасы Қайрат Мақсұтов қытайдың «ТВЕА» компаниясының басшысы Чжан Синмен кездесу өткізді. Тараптар энергетикалық жобаларды іске асыруға байланысты ынтымақтастық мәселелерін талқылады.

«ТВЕА» Басқарма төрағасы Чжан Син дәстүрлі энергетика, жаңартылатын энергия көздері және қосалқы станциялар құрылысы саласындағы бірлескен жобаларды іске асыруға дайын екенін білдірді. Ол компанияның атмосфераға шығаратын зиянды заттар шығарындыларын азайту жөніндегі жетістіктері туралы хабардар етіп, қазақстандық мамандармен тәжірибе алмасу үшін өз сарапшыларын жіберуді ұсынды.

Өткізілген кездесу қорытындысы бойынша Самұрық-Энерго мен TBEA көмірді газдандыру технологиясын зерделеу, атмосфераға бөлінетін зиянды шығарындыларды азайту және энергия қондырғыларын қайта құру бойынша ынтымақтастық туралы меморандумға қол қоюға келісті.

ТВЕА – күн энергетикасына арналған жабдықтар мен жиынтық құралдарды, сондай-ақ трансформаторлар мен басқа да электр жабдықтарын өндіруге маманданған қытай электр техникалық компаниясы.

Ұлттық киім киіп келген компания қызметкерлері мерекелік іс-шараның сән-салтанатын аша түсті.

Қонақтар үшін арнайы жайылған дастархан наурыз көже мен ұлттық тағамдарға толы болды.

Мерекелік іс-шарада әсем ән шырқалып, ұлттық күй орындалды және шашу шашылды.

Қызметкерлер арасында ұлттық ойындар ойнатылып, салт-дәстүріміздің бірі «Тұсар кесер» рәсімі өткізілді.

Кішкентай бүлдіршіннің тұсауын «Самұрық-Энерго» жергілікті кәсіподағы» ҚБ басшысы Бекбас Оразбек Телбайұлы кесіп, батасын берді.

Баршаңызды Ұлыстың Ұлы күні – Наурыз мейрамымен шын жүректен құттықтаймын! Наурыз - халқымыздың ежелден тойлап келе жатқан төл мерекесі. Тағылымы мол бұл күн – жаңару мен жаңғырудың, адам мен табиғат арасындағы үндестіктің, келісім мен татулықтың символы.

Наурыз – елдің ырыс-ынтымағын арттыратын айрықша мейрам. Бірліктің, татулықтың, ізгіліктің мерекесі. Адамдар Наурызда бұрынғы өкпе-ренішін кешіріп, бір-біріне амандық-саулық тілейді. Көктемге аман-есен жеттік деп, дастархан жайып, үлкендерге сәлем беріп, құттықтап жатады. Осы орайда Наурыз мейрамының ұлттық құндылықтарымыз бен дәстүрімізді жаңғыртудағы маңызы өте зор.

Ұлыстың ұлы күні Сіздерге және жақындарыңызға зор денсаулық, мол бақыт, бақ-береке тілеймін! Береке-бірлігіміз артып, ынтымағымыз нығая берсін!

Ұлыс оң болсын, ақ мол болсын!

Ізгі ниетпен,
Басқарма Төрағасы Қайрат Мақсұтов

«Самұрық-Энерго» АҚ Басқарма Төрағасы Қайрат Мақсұтов еншілес ұйымдардың басшыларына өндірісте қауіпсіз еңбек жағдайларын қамтамасыз етуді және жарақаттанудың нөлдік деңгейіне қол жеткізуді тапсырды. Бұл ретте ол еңбек қауіпсіздігі мәдениетін одан әрі көтеру қажеттігіне баса назар аударды.

Осы орайда 2023 жылы «Самұрық-Энерго» АҚ өндірістік қауіпсіздік қызметтерінің жұмысшылары NEBOSH, IOSH халықаралық бағдарламалары және «Қауіпсіздік мәдениеті» курстары бойынша дәріс алды. Олар өз кезегінде қауіпсіз еңбек дағдыларын дамыту тақырыбындағы  курстардан алған ақпараттарды әріптестеріне жеткізуде.

Сонымен қатар, Самұрық-Энергоның барлық еншілес ұйымдарында «Қауіпсіз өндіріс» жобасы іске асырылды. Ақпараттық жүйені енгізу еңбекті қорғау бөлімдері жұмысының тиімділігін арттыруға, кәсіпорындарда авариялар мен жарақат алу қаупін азайтуға мүмкіндік берді.

Сонымен қатар, компанияның барлық еншілес ұйымдарында қауіпсіздік бойынша аудиттерін жүргізу, қызметкерлердің қауіпті жұмыстарды тоқтату құралы (STOP-карта) және ұжымдық жауапкершілік секілді қауіпсіздік мәдениетінің белсенді индикаторлары енгізілді.

«Қауіпсіз еңбек жағдайларын қамтамасыз ету бойынша жұмысты күшейту және алдағы уақытта қызметкерлер арасында жазатайым оқиғаларды болдырмау мақсатында белсенді шаралар қабылдау қажет», - деп атап өтті «Самұрық-Энерго» АҚ Басқарма Төрағасы Қайрат Мақсұтов.

Кеңес қорытындысы бойынша, холдинг басшысы еңбек қауіпсіздігі және еңбекті қорғау саласындағы 2024 жылға арналған міндеттерді белгіледі. Олардың ішінде өндірістік процестерді одан әрі цифрландыру, жедел персонал үшін ақылды каска, кеуде камераларын енгізу, өндірістің ерекшелігін ескере отырып, арнайы киімнің бірыңғай стандартын әзірлеу міндеттері бар.

«Самұрық-Энерго» АҚ Басқарма төрағасы Қайрат Мақсұтов Екібастұз ГРЭС-1, Екібастұз ГРЭС-2 және «Богатырь Көмір» ЖШС-де көшпелі отырыстар өткізді.

Жұмыс сапары аясында электр энергетикалық холдинг басшысы Екібастұз ГРЭС-1-дегі №1 энергоблокты қалпына келтіру жұмыстарының барысын тексеріп, күзгі-қысқы жылыту маусымы бойынша, сондай-ақ №3 энергоблокты жаңғырту жұмыстары туралы есепті тыңдады.

Содан кейін Қайрат Мақсұтов «Самұрық-Энерго» АҚ Инвестициялық-инновациялық кеңесінің кезекті отырысын өткізіп, отынмен қамтамасыз ету өндірісі кешенін қайта құру және жаңғырту мәселесін қарады.

ГРЭС-2 станциясында «Самұрық-Энерго» АҚ басшысына қысқы жылу беру маусымы бойынша есеп берілді. Жалпы, ГРЭС-1 және ГРЭС-2-де жылыту маусымы штаттық режимде өтуде. Электр станциялары отынның нормативтен тыс қорымен қамтамасыз етілген. Сонымен қатар отырыста 2024 жылға жоспарланған ағымдағы және күрделі жөндеу жұмыстары, сондай-ақ үшінші және төртінші энергоблоктарды орнату арқылы ГРЭС-2-ні кеңейту және қайта жаңғырту жобасының барысы қаралды.

«Богатырь Көмір» ЖШС-де «Самұрық-Энерго» басшысы көмір өндірудің циклдік-ағынды технологиясы және циклдік-ағындық аршу жүйесі  жобаларын жүзеге асыру жұмыстарымен танысты. Одан басқа көмір сату нарықтарын дамытуға қатысты мәселелер талқыланды.

Халықаралық әйелдер күні қарсаңында «Самұрық-Энерго» АҚ еншілес ұйымдарының қызметкерлері Басқарма төрағасы Қайрат Мақсұтовтың бастамасымен энергетика саласындағы ардагер әйелдерді құттықтады.

Компаниялар тобының өкілдері өмір бойы ел игілігі үшін еңбек еткен ардагерлерге алғыстарын білдірді. Олардың қатарында Рыбленкова Қарашаш Абдарқызы мен Махметова Гүлсім Қазтайқызы бар. Екі ардагер де «Богатырь Көмірде» 40 жылдан астам еңбек етіп, «Көмір өнеркәсібінің еңбек сіңірген қызметкері» атағына ие болған.

Қазір Қарашаш Әбдарқызы мен Гүлсім Қазтайқызы зейнеттік демалыста немере-шөберелерін өсіріп отыр. «Богатырь Көмір» ЖШС қызметкерлері энергетика саласының ардагерлеріне алғыс хаттар мен естелік сыйлықтар табыс етті.

Мереке қарсаңында «АлЭС» АҚ қызметкерлері компания тарихына елеулі үлес қосқан зейнеткерлерге барды. Татьяна Федоровна Нестеренко компанияда 40 жылдан астам жұмыс істеп, өмірін энергетика саласының дамуына арнаған кәсіби маман.

Құлмұратова Ләззат Құлмаханқызы Ш.Шокина атындағы Қапшағай су электр станциясында рұқсаттама бюросының кезекшісі, Қырмызы Дүйсенқызы Қасымбалинова «АлЭС» АҚ отынмен қамтамасыз ету бөлімінде ұзақ жылдар жұмыс істеген. Ал Елена Степановна Бондарева едәуір уақыт бойы логистика бөлімінің басшысы қызметін атқарған. 8 наурыз мерекесіне орай «АлЭС» АҚ-ның 500-ге жуық зейнеткер әйелдері құттықтаулар мен ақшалай сыйлықтарға ие болды.

«Алатау Жарық Компаниясы» АҚ мен «Екібастұз ГРЭС-1» ЖШС қызметкерлері де өз ардагерлерін назардан тыс қалдырмады. Олар ұзақ жылдар энергетика саласында еңбек етіп, саланың дамуына елеулі үлес қосқан ардақты ардагер әйелдерге  мерекелік көңіл-күй сыйлап, мейраммен құттықтады.

Екібастұз ГРЭС-2 кәсіпорнының басшылығы мен белсенді жастары зейнеткерлік  демалыста жүрген энергетиктерге барды. Басқарма төрағасының жалпы және әлеуметтік мәселелер жөніндегі орынбасары Гауһар Нұғманова ардагерлерге сыйлықтар табыстап, стансаның құрылуына қосқан зор үлесі үшін алғысын білдірді.

«АлматыЭнергоСбыт» ЖШС бас директоры Еділ Көпенов мерекелік шараға ардагерлерді шақырып, оларды Халықаралық әйелдер күнімен құттықтады. Кездесу қонақтарға көтеріңкі көңіл-күй сыйлап, тамаша әсер қалдырды.

Энергетика ардагерлері көрсетілген сый-құрмет, ілтипат пен қамқорлық үшін  алғыстарын айтып, ризашылықтарын білдірді.

«Самұрық-Энерго» АҚ Басқарма Төрағасы Қайрат Мақсұтов пен Қытай Халықаралық су шаруашылығы және энергетика корпорациясы (ары қарай Қытай энергетика корпорациясы) директорлар кеңесі төрағасының орынбасары Ши Интао Қазақстанда алғашқы гидроаккумуляциялық электр станциясының (ГАЭС) жобасы бойынша ынтымақтастық келісіміне қол қойды. Тараптар жобаны әзірлеу және оны іске асыру бойынша бірлескен жұмыс туралы уағдаласты.

Атап айтқанда, Қытай энергетика корпорациясы Қазақстанның гидроэнергетикалық әлеуетін талдауды қоса алғанда, жоба бойынша техникалық-экономикалық зерттеуді жүзеге асыруға ниетті. Сондай-ақ, қытайлық мамандар гидроэнергетикалық жобаларды іске асыру тәжірибесімен бөлісуге және еліміздегі алғашқы ГАЭС құрылысына жәрдемдесуге дайын екендіктерін білдірді.

Бұған дейін Қытай энергетика корпорациясы Қазақстанның оңтүстігіндегі ірі су электр станциясы - Мойнақ ГЭС-ін салуға қатысқан болатын. Аталған келісім елдің энергетикалық секторының жаңа бағыттағы серпінді жобасын іске асыру үшін өзара тиімді әріптестік ынтымақтастықты нығайту мақсатындағы ниетті бекітті.

Айта кетейік, ГАЭС – электр жүктемесі кестесінің тәуліктік әркелкілігін теңестіру үшін қолданылатын су электр станциясы. Бұл станция электр энергиясын өндіріп және оны жинақтау үшін тиімді. Сонымен қатар ГАЭС төтенше  жағдайларда, тіпті жүктеме көп болған кезде де электр энергиясымен үздіксіз қамтамасыз ете алады.

«Самұрық-Энерго» АҚ Басқарма төрағасы Қайрат Мақсұтов Қазақстан Республикасы Премьер-Министрінің бірінші орынбасары Роман Склярдың қатысуымен өткен Энергетика министрлігінің кеңейтілген алқа мәжілісінде сөз сөйледі.

Қайрат Мақсұтов өз баяндамасында қол жеткізілген өндірістік көрсеткіштер мен 2023 жылы жүзеге асырылған инвестициялық жобалар туралы хабардар етті.

Қысқы жылу беру кезеңінің өтуіне қатысты компания басшысы «Самұрық-Энерго» электр стансаларында жылыту маусымы штаттық режимде өтіп жатқанын атап өтті. Энергетикалық нысандар отынның нормативтен тыс қорымен қамтамасыз етілген. 

Сонымен қатар, электр энергетикалық холдинг басшысы компанияның 2024 жылға арналған бірқатар инвестициялық жобаларын іске асырудың жоспарларымен бөлісті.

Электр энергетикасы саласындағы заңнаманы жетілдіру бағытында «Самұрық-Энерго» Энергетика министрлігімен тығыз байланыста және Үкіметтің қолдауымен аталған бағытта көптеген жұмыстар атқаруда.

2023 жылы негізгі инвестициялық жобаларды іске асыруды жеделдететін нормативтік құқықтық актілерге бірқатар түзетулер енгізілді. Қайрат Мақсұтов заңнамаға өзгерістер енгізу жұмыстары биыл да жалғасатынын атап өтті.

«Самұрық-Энерго» АҚ-да «Квазимемлекеттік сектордағы сыбайлас жемқорлыққа қарсы іс-қимыл шаралары» тақырыбында комплаенс-оқыту семинары өтті. Оған компания басшылығы қатысты, сондай-ақ іс-шараға құрылымдық бөлімшелер мен еншілес ұйымдардың қызметкерлері онлайн форматта қосылды.

Семинардың спикері ретінде Қазақстан Республикасы Сыбайлас жемқорлыққа қарсы іс-қимыл агенттігінің басқарма басшысы Мирас Қарғабай сөз сөйледі. Ол семинарға қатысушыларға сыбайлас жемқорлыққа қарсы жүргізіліп жатқан реформалар мен инновациялар туралы айтып берді.

Семинар барысында сондай-ақ сыбайлас жемқорлық құқық бұзушылықтардың алдын алу, оларды болдырмау мәселелері және парақорлыққа қарсы күрес аясында қандай шаралар қабылданғаны туралы түсінік берілді.