2. Басты бет
  3. Баспасөз

Ұлы Жеңістің 80 жылдығы: «Самұрық-Энерго» АҚ компаниялар тобының қызметкерлері ардагерлерге, тыл еңбеккерлеріне құрмет көрсетті

Жеңіс күні қарсаңында Самұрық-Энерго қызметкерлері өз ардагерлеріне ерекше ризашылықпен және алғыс сезімімен құрмет көрсетті. 

Б.Оразбаев атындағы 1-ЖЭО-да Ұлы Жеңістің 80 жылдығына арналған салтанатты іс-шара өтті. Дәстүр бойынша станция қызметкерлері станция аумағындағы Жеңіс ескерткішіне гүл шоқтарын қойды. ЖЭО жастар активі кәсіподақ өкілдерімен бірге тыл ардагерлері Прасковья Аксенова мен Алексей Коробкинге барды.

Алматы 3-ЖЭО қызметкерлері тыл еңбеккерлерін құттықтады. Олардың ішінде 94 жасқа толған Валентина Семеновна Максименко бар. 

«Богатырь Көмір» ЖШС қызметкерлері ардагерлер мен тыл еңбеккерлеріне де барды. Олар батырларға бейбіт өмір үшін терең ризашылықтарын білдіріп, мерейтойлық медальдарды табыс етті.

Жеңіс күні қарсаңында ардагерлер мен тыл еңбеккерлеріне «Алатау Жарық Компаниясы» АҚ ұжымы да алғыс білдірді. Олардың арасында соғыс жылдарында Калинин, Балтық және Беларусь майдандарында атқыштар полкінің құрамында болған ардагер Сәрсенов Қамбар Әмірұлы бар. Батылдығы мен ерлігі үшін ол Қызыл Жұлдыз орденімен, III және II дәрежелі Даңқ ордендерімен және басқа да медальдармен марапатталған.

Жеңіс күніне орай Өскемен және Шүлбі ГЭС қызметкерлері ҰОС ардагерлерін, концлагерьлердің бұрынғы жас тұтқындарын және қоршауда болған Ленинград тұрғындарын қолдау мақсатында дәстүрлі еріктілер акциясын өткізді. Екі станцияның қызметкерлерінен жиналған ерікті қаражатқа Шығыс Қазақстан және Абай облыстарында тұратын осы санаттардың барлық өкілдері үшін шамамен 500 кВт*сағ электр энергиясы төленді. 30 отбасына материалдық қолдау көрсетілді.

Ардагерлер «Самұрық-Энерго» АҚ қызметкерлерінің ықыласы және қамқорлығы үшін алғыстарын білдірді.

 

 

Жеңіс күніне арналады: 1-ЖЭО машинисі Панфиловшы батырлар шыңына шықты

Б.Оразбаев атындағы 1-ЖЭО бу турбиналарын басқарудың орталық жылу қалқанының машинисі Айдос Масиралиев Жеңістің 80 жылдығына орай  батырлардың ерлігін еске алу мақсатында 28 панфиловшылар шыңына көтерілді.

«Мен оларға сөзбен емес, іспен құрмет көрсеткім келді»,- дейді Айдос. Таудың суықтығына, өзінің шаршағанына, тыныс алудың қиындығына қарамастан, ол панфиловшылардың табандылығы, майдангерлерді құрмет тұтатын өз отбасы туралы ойлай отырып, шыңға жетті.

Айдос – «Үздік өндіріс маманы-2024» байқауының жеңімпазы. Ол осы уақытқа дейін талай шыңға және әр шыңға шыққан АлЭС туын желбіретіп шыққан. 

Бұл жай спорт емес. Бұл - ұрпақтар сабақтастығының символы, адам жадының заманымыздың жаңа кейіпкерлерінің істерінде, болмыстарында және жүректерінде өмір сүретіндігінің дәлелі.

 

 

III Charity Samruk Marathon: Самұрық-Энерго қызметкерлері қайырымдылық марафонына қатысты

«Самұрық-Қазына» Қоры ұйымдастырған ауқымды қайырымдылық шарасы Астана ботаникалық бағында өтті. Марафонға «Самұрық-Энерго» АҚ корпоративтік орталығы мен еншілес ұйымдарының 50-ден астам қызметкері қатысты. 

Жүгіру 5 және 10 шақырым қашықтықта өтті. Марафон қорытындысы бойынша 10 км қашықтықта «АлЭС» АҚ Басқарма Төрағасының кеңесшісі Газий Исмухамбетов (60+ санаты) және Екібастұз ЖЭО қызметкері Райгүл Рысқұлова (40-49 санаты) екінші орынға ие болды. 

«АлЭС» АҚ жөндеу қызметінің бас маманы Ержан Жанмайлов (40-49 санатында) және 1-ЖЭО электр монтері Бекзат Калелов (18-29 санатында) үшінші орынды иеленді. 

Марафон кезінде жиналған қаражат ерекше білім беру қажеттіліктері бар балаларға арналған инклюзивті кабинеттер ашуға бағытталатын болады.

 

 

Екібастұз ЖЭО-да жүргізілген оңтайландырудың арқасында отын шығыны айтарлықтай қысқарды

Екібастұз ЖЭО 2024-2025 жылдардың күзгі-қысқы кезеңінен сәтті өтіп, жабдықтардың сенімді және тұрақты жұмыс істеуін, сондай-ақ тұтынушыларды үздіксіз жылумен қамтамасыз етті.
Жылу беру маусымына дейін жүргізілген оңтайландыру мен жөндеу жұмыстарының арқасында отын шығынын едәуір қысқартуға қол жеткізілді: мазутты тұтыну 3,5 есеге - 3284 тоннадан 949 тоннаға дейін төмендеді. Мазутты қолдану көлемінің төмендеуі негізгі жабдықтың тұрақты жұмыс істегенін және станция жұмысының жалпы тиімділігінің артқанын көрсетеді.
Айта кетейік, 2024 жылдың маусым айында Екібастұз ЖЭО «Самұрық-Энерго» АҚ-ға сенімгерлік басқаруға берілді. Компанияның еншілес ұйымы – «Energy Solutions Center» ЖШС қысқа мерзімде ауқымды жөндеу іс-шараларын өткізді және станцияның қысқы кезеңге дайындығын қамтамасыз етті.
Сөйтіп, он қазандық агрегатына, турбина агрегатына қосалқы және жалпыстанциялық жабдыққа күрделі және ағымдағы жөндеу жүргізілді. Сонымен қатар күл үйіндісінің бөгетіне, ғимараттарға, құрылыстарға жөндеу жұмыстары жүргізілді, сондай-ақ станция аумағында су тұндыру магистралі салынды.
2024-2025 жылдардағы жылу беру маусымына дайындық шеңберіндегі жөндеу іс-шараларының нәтижесінде станцияның негізгі жабдықтарының тозу деңгейі 3,7%-ға, 51,8%-дан 48,1%-ға, технологиялық бұзушылықтар саны 90%-ға - 191-ден 18-ге дейін төмендеді. Сонымен қатар, күзгі-қысқы кезеңде жылумен жабдықтау сенімділігіне әсер ететін бірде-бір технологиялық бұзушылық тіркелген жоқ.
Жылу беру маусымы аяқталғаннан кейін Екібастұз ЖЭО-да келесі күзгі-қысқы кезеңге дайындық басталды. Станцияда жөндеу жұмыстары белсенді жалғасуда. Жоспарда  тағы алты қазандық агрегаты мен №3 ст. түтін құбырын күрделі жөндеуді қоса алғанда, 11 бірлік жабдыққа 11 жөндеу жүргізу тұр.

 

Самұрық-Энерго қызметкерлері жалпықалалық сенбілікке қатысты

26 сәуірде Астана қаласында «Таза Қазақстан» экологиялық бастамасы аясында жалпықалалық сенбілік өтті. Самұрық-Энерго қызметкерлері іс-шараға белсенді қатысты. Олар С.Нұрмағамбетов көшесі мен Р. Қошқарбаев даңғылының қиылысындағы аумақта ағаш көшеттерін отырғызып, көгалдандыруға өз үлестерін қосты. 

Орнықты даму және экологиялық жауапкершілік – «Самұрық-Энерго» АҚ басты басымдықтарының бірі!

 

Богатырь Көмір жаңа рекорд орнатты

2025 жылдың алғашқы тоқсанында жаңа жетістікке қол жеткізілді. «Богатырь Көмір» ЖШС мен «Қазақстан темір жолы» ҰК» АҚ арасындағы табысты әріптестіктің арқасында ақпан айында тұтынушыларға рекордтық 3,9 миллион тонна көмір жөнелтілді. 

Күн сайын қатты отын 33 түрлі бағытқа еш кідіріссіз жөнелтіліп отырды. Мұндай нәтижеге кеншілер мен теміржолшылардың жоғары үйлесімділігі мен жауапкершілігінің арқасында қол жеткізілді.

Осы жетістікке орай «Қазақстан темір жолы» ҰК» АҚ-ның «Біріктірілген жоспарлау дирекциясы» филиалының директоры Вадим Копылов компанияның атына алғыс хатын жолдады. 

«Богатырь Көмір» ЖШС-нің жүк тиеуді ұйымдастыруды жетілдіру және станция инфрақұрылымын тиімді пайдалану мәселелеріндегі белсенді ұстанымын атап өткіміз келеді. Бұл пойыздардың тұрақты жөнелтілуіне, жоғары өндірістік көрсеткіштерге қол жеткізуге және вагон паркін тиімді айналымға қосуға ықпал етеді», – делінген хатта. 

 

АлЭС-те өндірістегі жұмысшылар үшін тегін ыстық тамақ ұйымдастырылды

«Самұрық-Энерго» АҚ еншілес компанияларындағы өндірісте жұмыс істейтін жұмысшылардың әлеуметтік-тұрмыстық жағдайын жақсарту бойынша жұмысты жалғастыруда.

Жұмысшы мамандықтар жылы аясындағы әлеуметтік бағдарлама шеңберінде, АлЭС кәсіпорындарында өндірістік цехтарда еңбек ететін жұмысшыларды тегін ыстық тамақпен қамтамасыз ету жобасы алғаш рет іске қосылды.

А.Жақұтов атындағы 2-ЖЭО-да күн сайын 900-ден астам қызметкер сапалы әрі теңгерімді тамақ ішуде. Кезекші бригадаларға ыңғайлы болу үшін асхана тәулік бойы жұмыс істейді. Тамақ рационы мұқият ойластырылған, нормалар сақталған, ал ең бастысы құрмет пен жайлылық ахуалы қалыптастырылған. Аспаздар тамақты жан-тәнімен дайындайды, инженер-технологтар сапасына қадағалау жүргізеді, ал өндірістік жұмысшылар алғашқы жағымды пікірлерімен бөлісті.

«Басшылықтың бізге қамқорлық танытқаны өте қуантады. Бұл - біздің денсаулығымыз бен әл-ауқатымызға жасалған үлкен қамқорлық. Асханада тамақ өте дәмді, порциясы тойымды. Бәріміз тоқпыз, көңіл-күйіміз жақсы, жұмысымыз өнімдірек жүріп жатыр», – дейді «Энергожөндеу» ПРП шебері Мұхамеджан Оралбеков.

Жақын арада тегін ыстық тамақпен қамтамасыз етілетін жаңартылған асханалар Б. Оразбаев атындағы 1-ЖЭО-да, 3-ЖЭО-да, Ш. Шөкин атындағы Қапшағай СЭС-інде, ГЭС каскадында, БЖК-де және басқа да кәсіпорындарда іске қосылады.
Жалпы, тегін ыстық тамақпен шамамен 3000 қызметкер қамтылады.

 

https://youtube.com/shorts/FJ3ZVBNZkVI?feature=share

Еңбек қауіпсіздігі және еңбекті қорғау айлығы: жарақаттану деңгейін нөлдік көрсеткішке бірге жеткізейік!

Өндірісте жарақаттануды азайту және «Самұрық-Энерго» АҚ тобына кіретін барлық кәсіпорындарда қауіпсіз еңбек жағдайларын жасау мақсатында Дүниежүзілік еңбекті қорғау күніне орай «Еңбек қауіпсіздігі және еңбекті қорғау айлығы» өткізілуде.

Айлық барысында барлық өндірістік департаменттерде жұмыс орындарының жоспарлы аудиті жүргізілуде, бұл өндірістегі қауіпсіздік деңгейін одан әрі арттыруға бағытталған.

«Самұрық-Энерго» АҚ компаниялар тобының Еңбек қауіпсіздігі және еңбекті қорғау жылы аясында жаңа еңбекті қорғауды қамтамасыз ету құралдары енгізілуде. Мысалы, «АлЭС»-те қауіпсіздік техникасы талаптарының орындалуын орталықтан бақылау пункті ашылды.

Жүйе қауіпсіздік нормаларының сақталуын нақты уақыт режимінде бақылауға мүмкіндік береді. Бұл — жеке қорғаныс құралдарының қолданылуын, қауіпті учаскелерді анықтауды және жұмысшылардың жағдайын қадағалауды қамтиды.

Айлық шеңберінде өндірістік департаменттерінің қызметкерлері төтенше жағдайлар кезіндегі іс-қимылдар бойынша тренингтерден, алғашқы медициналық көмек көрсету бойынша шеберлік сабақтарынан өтуде. Өндірістегі қауіпсіздік мәдениетін арттыру - жарақаттану деңгейін нөлге жеткізу стратегиясының ажырамас бөлігі болып табылады.

 

Омбудсмендер кеңесінің өкілдері Мойнақ СЭС және Алатау Жарық Компаниясына барды

Алматы облысында «Самұрық-Қазына» АҚ портфельдік компаниялары Омбудсмендер кеңесінің көшпелі отырысы өтті. Оған «Самұрық-Энерго» АҚ омбудсмені Ақылов Нариман қатысты. 

Отырысқа қатысушылар «Самұрық-Энерго» АҚ-ның еншілес компаниялары - Мойнақ СЭС және «АЖК» АҚ, сондай-ақ «KEGOC»АҚ-ның Алматы АЭС-інде болды. Олар электр энергиясын өндіру мен берудің өндірістік процестерімен танысып, компания қызметкерлерімен кездесулер өткізді.

Сондай-ақ, омбудсмендер «Самұрық-Қазына» АҚ компаниялар тобының Ішкі коммуникациялар және сатып алу қызметі жөніндегі форумына қатысты. Форумда ұжымдағы кәсіби мінез-құлық қағидаттары қарастырылды. Форумның жеке блогы сатып алуды өткізу мәселелеріне және отандық өндірушілерді қолдау шараларына арналды.

АлЭС өндірістік алаңдарында 40-тан астам жаңа ауыз су бұрқақтары орнатылды

Таза су - әр жұмысшының денсаулығына жасалатын қамқорлық. Компанияның барлық өндірістік цехтарында заманауи ауыз су бұрқақтары пайда болды. Әрбір субұрқақ 5000 тоннаға дейін су тазартуға қабілетті сүзгілермен жабдықталған. Қызметкерлерді таза ауыз сумен қамтамасыз ету үшін сумен жабдықтаудың жаңа жүйесі жүргізілді. 

«Бұрын су ішу үшін алысқа бару керек еді, ал қазір субұрқақтар – таяқ тастам жерде. Мен күніне шамамен 5 литр cу ішемін: дене күшін қажет ететін жұмыс қой, сусыз қиын», - дейді А. Жақұтов атындағы 2-ЖЭО турбина цехының слесарі Нұрлан Сүлейман.

Жоба техникалық шешімдерді пайдалану арқылы жұмысшыларға қолайлы жағдай туғызды. Жаңа ауыз су бұрқақтары цехтарда жұмыс істейтін қызметкерлердің ыстық күндерде және өндірістегі ауыр жұмыс кезінде жандарына сая болып, тыныстарын кеңейтті. 

Самұрық-Энерго өндірістік қызметкерлердің әлеуметтік-тұрмыстық жағдайын жақсарту бойынша жұмысты жалғастыра бермек!

 

Самұрық-Энергоның энергетикалық станциялары жылу беру маусымын сәтті өткізді

«Самұрық-Энерго» АҚ 2024-2025 жылдардың күзгі - қысқы кезеңінде электрмен және жылумен жабдықтауды үздіксіз қамтамасыз етті және жылу беру маусымын сәтті аяқтады. Осы кезеңде компанияның жылу электр станциялары (ЖЭС) 18,6 млрд кВт•сағ электр энергиясын өндірді, ал босатылған жылу энергиясының көлемі 4,4 млн Гкал құрады. Энергетикалық холдингтің станциялары бүкіл жылу беру маусымы бойынша жылу берудің температуралық кестелерін сақтай отырып, штаттық режимде жұмыс істеді.

2024-2025 жж. КҚК барысында Екібастұз 1-МАЭС-те қуаттылығы 500 МВт №1 энергия блогы пайдалануға берілді, бұл станцияның жалпы белгіленген қуатын 4000 МВт-ға дейін арттырды. Осылайша, станция соңғы 30 жылда алғаш рет сегіз блокты жұмыс режиміне көшті.

Ағымдағы жылыту маусымында 2023-2024 жылдардағы ұқсас кезеңмен салыстырғанда Самұрық-Энерго станцияларында электр энергиясын өндіру көлемі 4%-ға ұлғайды. Көрсеткіштер технологиялық бұзушылықтар санының айтарлықтай төмендеуінің арқасында өсті, бұл жабдықтарды жөндеу, жаңғырту және пайдалану мәдениетін жақсарту бойынша жүргізіліп жатқан іс-шаралардың нәтижелілігін көрсетеді.

Атап айтқанда, өткен жылдың маусым айында «Самұрық-Энерго» АҚ-ға сенімгерлік басқаруға берілген Екібастұз ЖЭО-да энергетикалық қазандықтар мен қосалқы жабдықтардың бір бөлігін уақтылы жөндеу күзгі-қысқы кезеңде станцияның сенімді және тұрақты жұмыс істеуін қамтамасыз етті.

Алматы 1-ЖЭО, 2-ЖЭО және 3-ЖЭО-лар да жылу беру маусымын ойдағыдай аяқтап, Алматы қаласы мен Алматы облысының тұтынушыларын электр және жылу энергиясымен үздіксіз қамтамасыз етті.

Жылу беру маусымының аяқталуымен Самұрық-Энерго станциялары келесі күзгі-қысқы кезеңге жедел дайындыққа кірісті. Энергия объектілерінде қызу жөндеу жұмыстары басталды. Ағымдағы жылы негізгі жабдықтың 105 бірлігіне 114 жөндеу жүргізу жоспарланған. Жөндеу науқаны бекітілген кестеге сәйкес жүзеге асырылады және Самұрық-Энергоның барлық станциялары алдағы жылу беру маусымына дайын болады.